Question? Call Us +201550493628
Menu
سنة 2020 كانت سنة صادمة لينا كلنا بسبب جائحة كورونا والعزل المنزلي اللي استمر طول السنة تقريبًا، في الوقت ده زاد عدد مستخدمين منصات السوشيال ميديا بطريقة كبيرة جدًا ومن أعمار مختلفة، كما إن أغلب الموظفين اشتغلوا من البيت، وعملوا اجتماعاتهم على تطبيقات الفيديو زي زووم Zoom وغيره من التطبيقات اللي سهلت تواصلهم طول الفترة دي.
لكن دلوقتي في 2021 الناس تكيفت على الأحداث اللي مر بيها العالم، وأغلب أصحاب البيزنس سواء كبير أو صغير قدروا إنهم يعدوا المرحلة الحرجة دي من تاريخ البشرية، بالعكس كمان بعضهم قدر يحقق أرباح كتير أثناء المرحلة دي بعد لما اتجهوا أكتر للسوشيال ميديا والتسويق عن طريقها.
التسويق على السوشيال ميديا بمختلف منصاتها هو اللي بيشجع إدارة المنصات دي إنها دايمًا تطور من خصائصها وتضيف خواص جديدة تساعد المعلنين والمسوقين والمستخدمين للوصول لبعض بطريقة أسهل واكتر فعالية.
عشان تعرف تستغل السوشيال ميديا صح في حملاتك وتسويقك لمنتجك وخدماتك، لازم تتابع أحدث التريندات والتحديثات على منصات السوشيال ميديا المختلفة، وتعرف أكتر إزاي تطوع التريندات دي عشان تفيد البيزنس بتاعك بأكتر من شكل.
في المقال ده هنتكلم عن سبع تريندات على السوشيال ميديا في 2021 تقدر تستفيد منها.
في وقت قصير جدًا أصبحت السوشيال ميديا جزء لا يتجزأ من حياتنا اليومية، فكان طبيعي استخدام الشركات ورواد الأعمال ليها ياخد شكل مختلف للاستفادة من خواصها للوصول لعملائهم بشكل أفضل. لو انت صاحب شركة أو بتحلم تكون من رواد الأعمال المؤثرين في العالم، متابعتك لتريندات السوشيال ميديا هو جزء مهم من الحلم ده، فعن طريقها بتقدر توصل لعملاء جدد ومحتملين أسهل من الطرق التقليدية.
في 2020 عدد الأشخاص اللي اشتروا عن طريق الأونلاين زاد بطريقة غير مسبوقة، واللي أجبر أصحاب الأعمال إنهم يهتموا أكتر بالسوشيال ميديا، كمان بعض منصات السوشيال ميديا زي أنستغرام أضاف بعض الخواص الجديدة واللي بتدعم التسوق الأونلاين زي خاصية shoppable posts، وخاصية Instagram checkout والخاصية دي بتسمح للمستخدمين إنهم يكتشفوا المنتجات والعروض ويشتروا كمان من غير ما يخرجوا من التطبيق نفسه.
دلوقتي العائد من السوشيال ميديا بقى كبير، وبيزيد باستمرار، ولازم انت وفريقك تقدروا تواكبوا تطورها كل يوم عشان تحصلوا على أكبر عائد ممكن.
الـStories سواء على الانستغرام أو الفيسبوك بقت شكل مهم من أشكال المحتوى، وفي دراسة بتوضح إن المستخدمين بيتفاعلوا معها بنسبة 5.65% أكتر من الفيديوهات! كل يوم، في 500 مليون مستخدم بيقضوا وقت كبير جدًا بيشاهدوا وبيتفاعلوا مع Instagram Stories.
طبيعة الستوريز الغير دائمة بتشجع المستخدمين إنهم يشوفوها في أسرع وقت ممكن قبل ما تختفي بعد 24 ساعة من نشرها. الخوف من تفويت أي محتوى بيخلي للستوريز شعبية كبيرة جدًا، بالإضافة لكونها بتسمح للمستخدمين استخدام أدوات مشاركة وتعديل بكل أريحية، اللي بيسمح لهم ينشروا صورهم أو فيديوهاتهم بالشكل اللي يفضلوه وبالتعديلات اللي تناسبهم.
في 2021، منصات كتير من السوشيال ميديا زي Pinterest و Twitter وحتى LinkedIn اتبعت خطوات Facebook و Instagram و Snapchat وأضافوا خاصية إضافة Stories لمستخدمي المنصة بنفس الخصائص ويمكن أكتر من المنصات اللي أخدت الخطوة دي أولًا.
خلال 2020 كان استخدام الـLive على الفيسبوك أكتر حاجة منتشرة عليه، سواء عن طريق الإنفلونسرز influencers أو البراندات brands أو حتى الأشخاص العاديين، كمان ساعد البراندات والإنفلونسرز إنهم يزودوا تفاعل العملاء معاهم، وسمحلهم يتواصلوا بطريقة مباشرة مع عملائهم.
طيب ليه الناس بتشوف لايف فيسبوك؟
في استطلاع رأي قريب، بعض مستخدمي فيسبوك قالوا إن مشاهدة لايف فيسبوك بيساعدهم يواكبوا الأحداث ويعرفو كل جديد بيحصل في العالم، جزء تاني أكد إن ده بيحسسهم إنهم جزء من الأحداث دي مش مجرد متفرجين، في حين إن جزء أقل قال إن مشاهدة لايف فيسبوك بيدي مصداقية للحدث اللي بيتصور أيًا كان طبيعته.
المحتوى اللي بيتم إنشائه من المستخدم نفسه نوع من أنواع المحتوى اللي المعجبين أو العملاء بيصنعوه لبراند معين، ومنتشر جدًا على منصة التيك توك TikTok، ودي بتعتبر دعاية مجانية للبراند بتفيدها على المدى القصير، يعني كل اللي عليك إنك تشجع متابعينك يعملوا محتوى خاص بالبراند، وتستخدم المحتوى ده وتنشره عندك.
في شركات كبيرة زي Daniel Wellington بيشجعوا متابعينهم على إنشاء محتوى مميز وعمل tag للشركة على منصات السوشيال ميديا عشان ياخدوا فرصة نشر محتواهم على الصفحات الرئيسية. شركات زي Dove وOlay بيعتمدوا على محتوى متابعينهم بشكل أساسي في حملاتهم الإعلانية.
الواقع المعزز AR هو من أشهر الخاصيات على سناب شات، ومؤخرًا على كل منصات السوشيال ميديا اللي بتسمحلك تصوير Stories عن طريقها مباشرة، الخاصية دي بتكون على شكل filters مميزة، حاليًا البراندات بقت بتهتم بيها أكتر وبتستخدمها للتسويق لنفسها بفلتر مناسب ومرتبط بالمنتج اللي بيعلنوا عنه.
على الرغم من إن Snapchat وInstagram هم أشهر منصتين بيتم استخدام فيها الخاصية دي كـfilters، إلا إن منصات تانية بدأت تهتم بالواقع المعزز، وحاليًا فسيبوك بدأ يستخدم الخاصية دي في الإعلانات في 2021. بالإضافة إن شركات كتير بدأت تستخدمه في الترويج لمنتجاتها ومساعدة الناس يتعرفوا على المنتج اللي بيفكروا يشتروه قبل ما تتم عملية الشراء.
من أحدث التريندات على السوشيال ميديا هو تطبيق Clubhouse. حاليًا هو متاح لمتسخدمين منتجات Apple، ولكن نسخة الـ android تحت الإنشاء ومتوقع إطلاقها قريبًا جدًا. التطبيق بيتكون من غرف للشات ولكن صوتية مش كتابة كما هو معتاد، والمفترض تحصل على دعوة من مستخدم للتطبيق بالفعل قبل ما تقدر تستخدمه وتشارك في الغرف دي.
كلوب هاوس ما أعلنش عن أي خطط لدمج إعلانات وتسويق في التطبيق، بس الشركات
بعد انتشار تطبيق كلوب هاوس كتريند على السوشيال ميديا وزيادة عدد مستخدميه، بدأت بعض المنصات التانية تطور غرف للشات ولكن عن طريق الصوت زي LinkedIn وFacebook وTwitter وغيرهم، دايمًا مع ظهور فكرة جديدة بتبدأ باقي المنصات تطور منها بحيث ما تفقدش مستخدمينها، بل بتوفرلهم خواص إضافية تشجعهم على استخدام المنصة دي دونًا عن غيرها.
الغرف الصوتية دي بتساعد شركتك على بناء هوية صوتية مميزة، واللي أهميتها ماتقلش عن اهمية الهوية البصرية اللي بتهتم بيها دايمًا. كما إن الغرف دي فرصة مميزة لمشاركة مقتطفات من البودكاست الخاص بشركتك والسماح لمستخدمينك بالتواصل مع فريقك من خبراء المجال بشكل أفضل.
كل يوم فيه تحديثات على السوشيال ميديا، وكل يوم بتظهر خاصية جديدة أو حتى بتطور وبتظهر بشكل مختلف، فمن المهم إنك تتابع التريندات باستمرارعشان تحسن من تسويقك لمنتجاتك وخدماتك دايمًا وتعرف أكتر منصة على السوشيال ميديا هتتناسب مع منتجك.
Read more
Which Social Media Channel Should You Use For Your Business?
8 Steps To Choosing The Right Digital Marketing Agency
